Икенче бит
Туган ягыбызның тарихы тирән гасырларга барып тоташа. Борынгылар һәркем үзенең җиде бабасын белергә тиешле. Бабаларыбызның гомуми мәдәнияте безнекенә караганда күп өстен булуын әйтеп тормастан, һәркемнең үзенә шундый сораулар бирүен телисе килә. Мин кем? Минем ерак бабаларым кемнәр? Кылган эшләре нинди булган?
Балаларга патриотик, милли тәрбия бирүдә туган якны өйрәнү мөһим урын алып тора.
Халкыбызның элекке тормышын, йолаларын, яшәү рәвешен күз алдына китерү өчен музейларның әһәмияте зур. Үткәннәрне белми торып, хәзергене өйрәнеп булмый, ди халык. Тарихыбыздан, милли мәдәнияте бездән ераклашкан дәверләр дә булды. Менә шул чылбырны ныклы итеп бәйләүне күздә тотып без мәктәбебездә татар халкының этнографик музеен оештырырга булдык. Инициатива милли эшләр буенча завучыбыз Диләрә Вагыйз кызы Валеевадан булды. Ә эшне оештырып үз кулына алучы югары категорияле укытучы Әлфия Сәрвәр кызы Мәгъдәнова. Аларга һәрдаим ярдәм күрсәтеп, файдалы киңәшләрен биреп, янып йөрүче укытучылардан - өлкән укытучылар Нәкия Әхәт кызы Миңнеханова, Халидә Әлләм кызы Мөхәммәтдинова, кабинетны музей итеп җиһазлауда мәктәп директоры Сергей Григорьевич Кирьянов ярдәм итеп тордылар.
Әлфия Сәрвәр кызы эшне үзенең татар теле буенча I сыйныфтан бирле укыткан, хәзер инде X сыйныфка җиткән укучылары белән оештырды. Алар әби-бабаларыннан беренче экспонатларны алып килүчеләр дә беренче экскурсоводлар да яки беренче карлыгачлар да булып торалар. Борынгы бабаларыбызның тормыш-көнкүрешен күз алдына бастырырлык хикмәтле әйберләр монда шактый: иске ачкычлар, җиз, бакыр самавыр-комганнар да, гади кеше көн дә кия торган чабаталар да... Боларның барысын да тупларга, хәзинәләребезне барларга укучылар, өлкән яшьтәге әби-бабаларыбыз, мәктәптә эшләүче укытучыларыбыз, әти-әниләр булышты. Аларга зур рәхмәт.
Менә инде дулкынландыргыч көн - музейны ачу тантанасы – 1997 елның 30 апреле килеп җитте. Бу тантанага ГУНОдан методистлар Гаусиева Гадәния Фатыйх кызы, Камалова Роза Юныс кызлары, шулай ук үзенең фатихасын бирергә Хасбиулла бабайны да чакырдык. Мәктәпнең режиссёры Галина Павловна Малькова бүләк итеп “Музейга бару” исемле сәхнә әсәре әзерләгән икән. Аны караганнан соң, мәктәп директоры С.Г.Кирьянов кызыл тасманы кисте, кунаклар җырчы Гөлзада Сафиуллинаның мөнәҗәтләре көе астында музейга үттеләр. Хасбиулла бабайның моңлы азан тавышы ишетелде, ул безгә үзенең фатихасын бирде. Анан соң инде кунаклар тантанабыз белән котладылар, бүләкләрен тапшырдылар. Нинди генә зур бәягә торырлык бүләкләр бар иде анда. Музей киштәләребез әкренләп шулай тулыланыр дип өметләнәбез.
Сүз экскурсоводларга бирелде, алар ике дәүләт телендә дә музей бүлекләре буенча чыгыш ясадылар. Соңыннан инде табын янында бергәләшеп чәй өчтек. әйе, шулай итеп, бәйрәм тантанабыз тәмам. Ә хәзер музеебызга якынрак килик. Сәяхәтебезне “Әби-бабаларыбызның өе” исемле бүлектән башлыйбыз.